В русиньскім совіті найвеце мандатів здобыв список Русины вєдно

17-го новембра 2022-го року сербска Републікова выборча комісія публіковала резултаты меншыновых выборів, котры проходили в неділю 13-го новембра. Народностны меншыны собі в них выберали новый склад своїх націоналных совітів.

Новый склад совіту голосованьом выберали і Русины. Як інформовала аґентура Рутенпрес, в офіціалных документах ку выборам ся пише, же в списку русиньской народностной меншыны было записаных 7 247 людей з правом голосовати. Голосовати пришло 3627 людей, значіть участь была 50 процент. Русины голосовали довєдна на 188 місцях.

Русины вєдно выграли і посилнили мандаты

До Націоналного совіту Русинів, орґану русиньской народностной самосправы, кандідовало тот рік пять кандідачных списків. Тот рік вшыткы спискы здобыли мандаты. Перед штирьома роками, коли было піднятых сім списків, мандаты розділило собі лем шість з них.

Єднозначным переможцьом знова став список Русины вєдно, як і штири рокы тому, котрый здобыв 1 690 голосів і в новім складі Націоналного совіту Русинів буде мати 10 мандатів. Хоць здобыв лем дашто понад 23 процент голосів, што є о 15 процент менше в порівнаню з попередніма выборами, при новім розложіню сил буде мати о два мандаты веце як мав дотеперь.

Список Вєдно за Войводину – ОЛЕНА ПАПУҐА буде в совіті знова з двома мандатами, котры мав і дотеперь, хоць перед штирьома роками тот кандідачный список ішов під назвов Быти і зістати Русином – Олена Папуґа. Тот рік список Олены Папуґы дістав 474 голосів.

442 голосів здобыв список Русиньска будучность, што му в новім совіті забезпечіло так само два мандаты. І Русиньска будучность зіставать з єднакым чіслом мандатів, кедьже дві кресла належали тому списку і дотеперь.

Погіршыв собі список За Русинів – Желько Ковач. Покля штири рокы тому у выборах здобыв три мандаты, в новім складі совіту уж буде мати лем двох представителів. Список здобыв у выборах 481 голосів.

Руска матка за Русинів, кандідачный список, котрый підняла членьска орґанізація Світового конґресу Русинів – Руска матка, пересвідчів 492 людей, котры му дали голос. Буде мати три мандаты і список з лідером проф. Михайлом Фейсом став другым найсилнішым у выборах по Русины вєдно.

Выборчі „аномалії“

Хоць список Русины вєдно знова єднозначно переміг у выборах і другый найсилнішый список, котрый підняла Руска матка, зохабив далеко за собов, вопросы выкликують дакотры „аномалії“, котры при выборах были.

Таков аномалійов є голосованя в Дюрдьові, де 448 голосів здобыв список Русины вєдно і 42 голосів мала Русиньска будучность. Далшы три кандідачны спискы не здобыли ани єден голос. Запис містной выборчой комісії з голосованя публіковала на соціалній сіті лідерка списку Вєдно за Войводину – ОЛЕНА ПАПУҐА. Люди на профілі Папуґы в повязаню з публікованым записом выражали похыбности о транспарентности выборів.

Олена Папуґа ся такой 14-го новембра звернула писмом до Републіковой выборчой комісії, жебы тота, як головный орґан у выборах, перевірила резултаты з Дюрдьова.

Як ся голосовало в окремых місцях

Без огляду на резултаты в Дюрдьові, посмотриме ся і на далшы місця, де ся голосовало, жебы видіти, де мав переможця выборів, список Русины вєдно, найвекшу підпору.

В Шіді тот список здобыв 73,96 процента. В споминанім Дюрдьові то было 91 процент голосів. В Коцурі домашній Михайло Фейса не переміг, із своїм списком скінчів другый, але найуспішнішы там не были ани Русины вєдно, котры скінчіли аж треті. Найвеце голосів там здобыла Русиньска будучность.

Головный центер войводиньскых Русинів – Руськый Керестур, так само голосовав найвеце за список Русины вєдно. Мав там 48,89 процента голосів.

Список Вєдно за Войводину – ОЛЕНА ПАПУҐА переміг у Вербасі, такой за ним была Руска матка, а Русины вєдно там здобыли аж третє місце. Олена Папуґа выграла і выборы в столиці Войводины – Новім Саді. Цілковый переможця Русины вєдно быв у Новім Саді декласованый і сінчів аж на четвертім місці.

Силный мандат здобыв список Русины вєдно в Кулі, де мав 72,53 процента голосів і далшы кандідачны спискы зохабив далеко за собов.

Фото: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА