В русиньскым Борові выремонтуют дім культуры

В русиньскым Борові, што находит ся в Лабірскій Долині, селі якє од деякого часу є частю міста Меджелабірці, буде выремонтуваний місцевий дім культуры. Доносит о тым словацкій денник Korzár, котрий дальше іфнормує, же одновліня дому буде сфінансуване з европейской дотациі, а меджелабірскій самоуряд доложыт до проєкту лем нецілых 8 тис. евро.

Як про денник іфнормувал бургомайстер Меджелабірців, будинок є в планным стані. О ґрант на його модернізацию самоуряд ся старал уж перше, але не был то успішний старунок. Єднако тепер подарило ся позыскати грошы. Цілковитий кошт ремонту вынесе близко 150 тис. евро. 

Закля Борів был окремом адміністрацийном єдиницьом, в будинку засідал сельскій уряд, але пак служыл він жытелям лем час-до-часу, при поєдных стрічах ци культурных акциях. Модернізацийний проєкт передвиджує ґенеральний ремонт. В його рамках будут поміняны выгляды ай двері, а при тым вшыткы підлогы, стріха і поліпшене буде загальне отепліня будівли. 

З Лабірской Долины походят днешні вызначны русиньскы активісты, котры часто роблят на ниві нашой культуры, высылают в русиньскых медиях, або занимают ся професийональным русиньскым театром. Сусідньом до Борова є Габура – село, в якым стоіт одкрытий в 2014 р. памятник Князя Лабірця – леґендарного славяньского вождя з кінця ІХ ст. Дальше з Габуры мож іти до Чертіжного, котре сусідує з лемківском Черемхом. Там, м.ін. похоронены сут вызнанчы русиньскы діячы як Адольф Добряньскій (1817-1901; 2017 рік є оголошений його пропамятным роком) ци Юлий Ставровскій-Попрадов (1850-1899). По правым боці од Борова находит ся Микова – родинне село родичів короля поп-ару Енді Варголя.  

фот. скрін goooglemaps.com