В суботу, 3. липця/юлия, зас рушат автобусове получыня в реґіоні Вышній Земплин

Од суботы, 3. липця/юлия, рушат сезонова автобусова ленія в обшыри Вышній Земплин. Aвтобус є допасуваный до польско-словацкого желізницьового получыня Санок-Меджелабірці.

Пілнічно-східня част Словациі з рока на рік притігат веце туристів, тіж тых заграничных, в тым з Польщы. Цікавым розвязаньом може быти подорож в тоту част Пряшівской Руси публичныма середками транспорту: потягом і автобусом.

Крайска Орґанізация Туристичного Руху Пілнічно-Східня Словация (во спілпрацы з перевозительом SAD Humenné, a. s., OZ Vranov n/T) одкрыват літом, подібні як минулого рока, сезонове автобусове получыня медже Меджелабірцями а Свидником. Туристичный автобус «Вышній Земплин» буде іздил в суботы і неділі од 1. липця/юлия до 19. вересня/септембра 2021 р. Автобус є безпосередньо допасуваный до польско-словацкого получыня Санок-Лупків-Меджелабірці, котре фунґує уж од долшого часу і є реализуване словацком желізницьом. В звязку з тым туристы з Польщы можут зачати свою прогульку на Словацию іщы в Польщы – в Саноку (о год. 8.34), а пак пересісти ся з потягу до автобусу, якій буде іхал на Свидник. Вчас той трасы будут мати нагоду познати історию, культуру ци архітектуру пілнічно-східньой Словациі.

З міста Меджелабірці автобус одізджат о год. 10.35. Ціна переізду то 3 евро за особу. Очывидно зо Свидника є получыня назад до Меджелабірців, так жебы подорожуючы встигли на потяг Меджелабірці-Лупків-Санок, якій одізджат о год. 17.48.

Новый рік, нова траса

«Не лем Словакы, але і польскы туристы з підкарпатского воєвідства і інчых части Польщы можут літом ліпше познати реґіон Вышнього Земплина, котрый знаный є з богатства природы і памятників культуры. Автобусова ленія є продолжыньом минулорічного пілотажового проєкту. Того рока буде іщы атракцийнійше як влони, бо туристам буде товаришыл професийный провідник, котрый опровадит по вшыткых атракциях» – оповідат Мартін Яношко, директор реґіональной туристичной орґанізациі KOCR Severovýchod Slovenska.

Порівнуючы з минулым роком, траса є кус змодифікувана. «В реґіоні находит ся вельо деревяных церкви, з котрых част находит ся на списку світовой спадковины ЮНЕСКО. Протягом єдного переізду заінтересуваны будут видіти Музей Сучасной Штукы Енді Варголя, Монастыр в Красным Броді, пару деревных церкви, а тіж Войсковый Музей в Свиднику» – продолжат Яношко.

Туристы можут схоснувати і нічлігову оферту Свидника і комплексовы 2-, 3-дньовы туристичны пакєты. Цілый проґрам найдете на сайті www.severovychod.sk.