В Тополі выникать ремеселный центер

Як інформовала аґентура ТASR, в селі Тополя, Сниньского окресу, де народив ся будитель Александер Духновіч, выникать копія традічной деревяной хыжі з перелому 19-го і 20-го столітя. Має служыти як ремеселный центер.

Вшытко то ініціатіва обчаньского здружіня Кошарь, котре ся пустило до реалізації того заміру вдяка реґіоналній дотації з проґраму підпоры найменше розвитых окресів Міністерства інвестіцій, реґіоналного розвитку і інформатіації Словацькой републікы.

„Традічна култура нашых предків сохранила ся співами і танцями, но автентічна архітектура цалком счезла, а вєдно з ньов і ремесла з тым повязаны. Стары майстры вымерли, молоды ся не учіли,“ повів про аґентуру Ярослав Лехан з обчаньского здружіня, жебы поснити, чом ся хыжа будує.

За його словами ремесла заслужать собі почливость, деревяна хыжа буде служыти як ремеселный центер. Люди ся там будуть годны познакомити з ремеслами і самы выпробовати гончарьство, роботу із соломов на стріху, кошыкарьство ці выробу деревяных шындлів.

Хыжу зачали будовати минувшый рік і дістали на ню дотацію 61 тісяч евр. Робота теслярів ся робила традічно, без гвоздиків. В найблизшім часі має зробити ся шындльова стріха і ваковка. „Деревяна хыжа буде комплетно в глинянім кожуху,“ доповнив Лехан з тым, же в літі уж бы мала будова служыти планованому заміру.

Фото: FB/Ярослав Лехан.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА