В Украіні зыйдут ся Тылявяне

B найблизшу неділю, 22. жолтня/октобра, в просторах Центральной Районной Бібліотекы в Теребовли на Украіні пройде стріча бывшых жытелів села Тылява. По роках прожываня на чужыні зыйдут ся они, штобы поспоминати рідне село. Вчас подіі запрезентувана буде найновша книжка про Тыляву пн. «Порваны коралі. Розмышляня про село Тылява» авторства Петра Кырпана. 

Буде то уж друга така стріча в Украіні. Як інформує нашу редакцию єй орґанізаторка, Анна Кырпан, […] буде то подібна стріча, рівно рік од першой, але кус інакша, понеже буду презентувала книжку мого няня про Тыляву. Выдала-м ю аж два рокы по його смерти. Влонишня стріча, што проходила в Івано-Франківску, была бодай першом того рода, на яку пришло так вельох родаків маючых коріня як раз в тым лемківскым селі.

Орґанізация стрічы в Теребовли гейбы повязана є з фактом, што в самій місцевости і єй околицях прожывают переселены ту в 40. роках ХХ ст. Тылявяне і іх потомны. На тогорічну стрічу просит ся вшыткы ґенерациі Тылявян – од колишніх жытелів по іх діти та внуків. По Теребовли будут дальшы стрічы Тылявян та презентациі няньовой книжкы в місцях, де жыют люде нашого села, іх діти і внукы – доповідат А. Кырпан. 

Книжка «Порваны коралі. Розмышляня про село Тылява» недавно трафила на поличку бібліотекы Руской Бурсы в Ґорлицях. Фраґменты книжкы можете заєдно чытати в печатаным Стоваришыньом Лемків «Лемківскым Річнику 2015».