В Уліч-Кривім зреконштруовали оплочіня церькви

Оплочіня деревяной Церькви святого Михаіла Архістратіга в русиньскім селі Уліч-Криве в окресі Снина є по десятках років оправлене і скомплетізоване. Інформовав о тім словацькый денник Korzár.

Селу ся то подарило в рамках дотації із Проґраму обвновліня села (Program obnovy dediny), котра была в сумі приблизно 5000 евр, повів про денник староста села Мілан Січак. Деревяне оплочіня было в гаварійнім стані, не было ани докінчене. Майже 40 процент оплочіня мало быти провізорно лем із желізного плота.

За словами старосты село реґуларно навщівлюють турісты головно зато, жебы посмотрити деревяну церьков. І то была причіна, чом село вырішыло реалізовати проєкт обновліня оплочіня. Реконштрукція ся зробила за два місцяці і робили на ній робітници села, котры ся о ареал коло храму старають і почас рока.

Церьков св. Михаіла Архістратіга

Ґрекокатолицька церьков в Уліч-Кривім была збудована у 1718-ім році. Была присвячена св. Михаілови Архістратігови. Почас другой світовой войны быв в році 1944 храм значно пошкодженый.

Є збудованый в зрубовім штілі на камінных закладах. Є бойківского тіпу. Церьков має дві турні, і три части храму з бабиньцом. Высша вежа є як раз над бабинцьом, низша на святилищом. У высшій турні суть три дзовны, найстаршый походить із 1811-го року.

Храм має іконстостас, котрый походить із 18-го столітя. На бочных стінах церькви вісіть дакілько цінных ікон: св. Архангел Михаіл, Хрістос із Небесныма Силами, ікона Годоґетрії ітд. Окрему увагу заслужыть собі ікона Манділіон, лице Хріста на ручнику, котра є на хорі. У святилищі за іконостасом є на престолі цінна ікона Богородіці, котра тримать на руках тіло мертвого Хріста. Цінны сути і іконы св. Миколая ці Хріста Пантократора. Тоты іконы походять із 16-го аж 17-го століть. Правдоподібно належали до мобіліару церькви, котра в Уліч-Кривім была перед тым. Іконостас быв комплетно зреконштруованый в роках 1988 – 1992.

Жрідло фотоґрафії: slovakia.travel

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА