В Ужгороді праздновали перенесіня мощей блаженого священомученика Теодора

Як інфомровав сайт Мукачовской ґрекокатолицькой єпархії на сіті Facebook, в неділю 28-го юна 2026-го року в Ужгородьскій ґрекокатолицькой богословской академії одбыла ся торжественна літурґія із нагоды 25-ой річніці выголошіня за блаженого священомученика Теодора Ромжу, мукачовского єпіскопа.

Головным служытельом быв Преосвященый владыка Теодор Мацапула, мукачовскый єпарха. Вєдно з ним служыли і Преосвященый владыка Ніл Лущак, помічный мукачовскый єпіскоп, єпіскопи русиньской традіції – Высокопреосвященый владыка Філіп Кочіш, архієпіскоп і митрополіта гайдудороґскый, голова Мадярьской ґрекокатолицькой церькви, і Преосвященый владыка Мілан Лах, братіславскый єпарха.

Присутный быв і кір Микола Семанишин, помічный єпіскоп Івано-Франківской архієпархії Україньской ґрекокатолицькой церькви.

Беатіфікація блаженого священомученика Теодора Ромжы (рр. 1911 – 1947) одбыла ся 27-го юна 2001-го року в Львові, почас навщівы Святішого Отця Йоана Павла ІІ. на Україні.

Праздник блаженого Теодора быв наперед встановленый на 1-ый новембер, день коли вмер, но у 2008-ім році быв на жадость Мукачовской єпархії – втогдышнього єпархы кір Мілана Шашіка, перенесеный із згодов Святішого Престола на 31-го октобра із душпастырьскых причін.

Мощі блаженого, котры были розметаны і знеучтены за влады комуністів, были загнаны на експертізу до Будапешті. У 2003-ім році, 28-го юна, были торжественно через Маріяповч в Мадярьску і Собранці на Словакії перенесены до Ужгорода, де суть уложены в Хрестовоздвиженьскім катедралнім соборі. Зато ся одвтогды святкує і 28-ый юн як праздник пренесіня мощей блаженого.

Ужгородьска ґрекокатолицьцка богословка академія несе імя блаженого Теодора Ромжы. На Підкарпатю назвали в дакілько селах і в містах Берегово, Мукачово, Ужгород і Хуст уліці по блаженім.

Фото: FB/Мукачовска ґрекокатолицька єпархія.