Варголь і його Фактори, Люпа і його Варголь – подія в краківскым МОЦАКу

Текучий рік в обшыри сучасной штукы сміло можеме назвати роком Енді Варголя: 22. лютого/фебруара припоминали сме 30. річницю смерти короля поп-арту – русиньского артисты, котрого корені сігают до Миковой на Пряшівскій Руси. Для вельох музеів, ґалерий і другых місц, де мож видіти світовы перлинкы вшыткых галузи артизму, округла річниця часто являт ся причынком до приближыня творчости родженого в американьскым Пітсбурґу артисты-перформера.

Краківскій Музей Сучасной Штукы МОЦАК то такій простір, в котрым Варголь являл ся і без округлой річниці (позерайте на нашы статі о выставі 10 портретів Жыдів ХХ столітя), аж і влони дождал ся там свойого місця в виді постійной експозициі авторства Кристияна Люпы Live Factory 2, збудуваной на основі сценоґрафіі до його пєсы Factory 2, котрой премєра одбыла ся в 2008 р. Люпа навязує в ній до культового Фактори (Factory) – місця, основаного в Ню Йорку Е. Варгольом, де стрічали ся найславнійшы артисты, музыкы і акторы світа. Царствувала там безгранична свобода, бо головном цілю было максимальне однятя загамувань і упереджынь. Жытя в Фактори было постійным перформансом, выкликуючым в присутных вершыну індивідуальности.

30. річниця смерти короля поп-арту сходит ся з першом річницьом одкрытя постійной експозициі Кристияна Люпы в краківскым Музею Сучасной Штукы, котрой вернісаж одбыл ся 14. марця 2016 р. Обі річниці то добра нагода, жебы зайти до МОЦАКа в найблизший понедільок, 13. марця т.р., де на фоні інсталяциі Live Factory 2: Warhol by Lupa буде мож стрітити ся з К. Люпом і акторами його спектаклю Factory 2. Там же, враз з режысером і артистами, орґанізувана буде акция, котра приближыт личніст Енді Варголя, його влияня на сучасну штуку, а тіж – на примірі однесіня до варгольового Фактори – пояснит феномен непрестанных інспіраций його особом і вшыткым, што вытворил за своє плідне артистичне жытя.

На святкуваня срібного періоду нюйоркского Фактори краківскій Музей Сучасной Штукы МОЦАК просит до своіх просторів в найблизший понедільок, 13. марця 2017 рока, на 18.00 год. (адрес: Краків, ул. Ліпова 4).