Великоднє богослужыня на Святій Горі Явір

Час пасхальной радости вірны православной церкви одсвяткували торжественным богослужыньом на Святій Горі Явір. Православный архієпископ Паісий враз з духовенством одправил пасхальну Літургію. Перед тым владыка справил чын постригу, высвячыня за чтеця выхованка варшавской семінариі Фомы Болеха.

Владыці спілслужыли о. Володислав Канюк з Ганчовы, о. Петро Пупчык з Крениці і о. Ярослав Ґрич – парох Ґладышова і Ждыні, a тіж новопоставленый діакон Лука Копча.

Лекторска хіротонія одбыла ся перед Божеском Літургійом. Фома Болех походит з Лемковины, ціле своє дотеперішнє жытя был звязаный з рідным селом Ждыня. Од молодых років служыт, співат і чытат в церкви. Активно бере участ в жытю свойой рідной парохіі і перемышльско-ґорлицкой єпархіі – од 25. жолтня/октобра 2025 р. єст ведучым Братства Перемышльско-Ґорлицкой Єпархіі. Актуально єст студеном ІІ рока Православной Духовной Семінариі в Варшаві.

Вчас богослужынь вознесено молитвы за митрополиту Саву, якій наступного дня святкувал свій ден народин, а тіж за вшыткых жертводавців будовы новой церкви на Яворі.

Хоц будова православного храму фурт продолжат, богослужыня прошли всередині новобудуваной церкви. По них одбыла ся спільна пасхальна гостина.

Чтец то першый чын православного кліру, низша ступін церковнослужытеля. За чтеця высвячує єпископ через хіротесию, яку звершує ся архієрейскым благословіньом та положыньом рук во знак затверджыня на церковній посаді. Обовязком того, хто принял тото служыня, єст чытаня богослужбовых текстів і Апостола.

фот. о. Ярослав Ґрич / orthodox.pl