Via Carpatia серед головных комунікацийных пути Европейской Уніі

Via Carpatia і Центральный Комунікацийный Порт были вписаны Европейском Радом до базвой сіти Трансевропейской Транспортовой Сіти (TEN-T).

Початком грудня/децембра тр. в Бруксели прошло засіданя Рады дс. Транспорту, што тыкало розвитку трансевропейской транспортовой сіти TEN-T. Єдном з найважнійшых квестий была дискусия над проєктом новелизациі розпоряджыня в справі розвитку трансевропейской транспортовой сіти (TEN-T).

Via Carpatia головном комунікацийном путьом

Найважнійше рішыня, якє пало на стрічы, тыкат дороговой пути Via Carpatia, што лучыт пілнічну і полудньову Европу. Via Carpatia нашла ся серед стратеґічных комунікацийных шляків в ЕС. Вписали гын тіж Центральный Комунікацийный Порт.

Новый коридор Балтийскє Море – Чорне Море – Еґейскє Море, котрого частю є будувана в Польщы Via Carpatia, дополнили одтинком Люблин-Білосток-Елк, дальше траса іде аж до Таллінна і Гельсінок. На полудни коридор выдолжыли аж до Кіпру. Тото рішыня уможливит отримати дофінансуваня на будову Via Carpatia з унійных середків.

«Выпрацуваны записы становлят основу до дальшой роботы в рамках неґоцияций з Европейскым Парляментом. То дає нагоду, жебы документ, уж по выпрацуваню компромісу з Европейскым Парляментом, приняти уж в 2023 році» – скоментувал рішыня міністер інфраструктуры Анджей Адамчык.

Тіж през Украіну?

Адамчык додал, што на тепер основне є тіж пошырити сіт TEN-T на Украіну, што вчас тырваючой войны становит ясный сиґнал о браку згоды на нарушыня територияльной інтеґральности нашого східнього сусіда.

«Цілый польскій одтинок шляку Via Carpatia взяли до увагы в базовій або базовій пошыреній сіти TEN-T, в ході нового коридора» – підкрислил міністер.

На обшыри Польщы в склад дороговой пути Via Carpatia входят одтинкы експресовых доріг S61, S16, S19 медже місцевостями Будзіско (границя державы), Сувалкы, Елк, Білосток, Люблин, Ряшів, Барвінок (границя державы). Доцільово дорога буде вела через пят воєвідств. Будову польского одтинка мают скінчыти в 2026 році. Via Carpatia на обшыри Польщы то траса, котрой долгіст вынесе близко 700 км.