Голосник

Вігорлатьскый музей ожывлює ремесла

Знаня передаваны з ґенерації на ґенерацію, зручность і запаленость про творчу діялность, умелецькый талент і забавне спознаваня реґіоналной історії в автентічнім оточіню експозіції народной архітектіры і бываня (в сканзені) пропонує Вігорлатьскый музей в Гуменнім почас літнього проґраму обявльованя новой дімензії традічных ремесел реґіону.

Літній зажытковый проґрам під назвов Цікл творчіх варштатів традічных ремесел про верейность – Ожывлены ремесла буде презентовати традічны ремесла, котры стояли на початку розвитку народной ремеселной і умелецькой творчости. Цікл варштатів є напланованый од 19-го юла до 30-го авґуста 2020-го року в пятьох окремо заміряных областях. Інформовала о тім Яна Федічова із Вігорлатьского музею в Гуменнім.

Проґрам на пять неділь

Почас пятьох неділь представить музей і реґіоналны носителі традічной ремеселной културы ковальство, ремінярьство, роботу зо соломов, выробу шындлів і традічных матеріалів на покрываня стріхы, тканя на короснах, роботу з вівчов вовнов, токарьство, столярьство (гобляьрство) і підмальбу на склі.

В рамках проґраму, котрый буде все проходити од 14.00 до 18.00 год., будуть ся вказовати традічны ремеселны поступы, інштрументы потрібны про тоту роботу і выробкы, но участны будуть годны видіти і тематічны выставкы ку окремым темам варштатів. А чекать їх і супроводный проґрам.

В ареалі сканзену будуть навщівници мати можливости спробовати собі окремы ремеселны технікы в рамках творчіх варштатів і познакомити ся з ремеслами і посередництвом переглядкы сканзену.

Як інформовала Яна Федічова з Вігорлатьского музею, ареал сканзену, де суть і обєкты з русиньскых сел, є унікатным вказаньом споїня традічной народной сакралной културы, културы бываня і господарьской културы з презентаційов сохраненого унікатного комплексу традічных ремеселных будов, інштрументів, ремеселных выробків, предметів і поступів народной умелецькой творчости, котры документують господарьскый розвиток вышнього Земпліна.

Перша неділя з ковальством

Почас першой неділі 19-го юла музей позывать в рамках творчіх варштатів на стрічу з традіційов ковальства і можливостьов рекреачного райтованя на конях.

Ковальство в сканзені репрезентує автентічна фунґуюча ковальска дільня з русиньского села Нехвальполянка. Інтерьєр зрубовой будовы творить огниско з ковальскым міхом, ковадлина, різны тіпы молотків, кліщів ці ковальскых выробків.

Атмосферу ремеселных творчіх варштатів в сканзені доповнюють дві выставкы. Першов є тематічна експозіція традічного земледільского верцайґу (серсаму) і машын, другов є выставка творів европского інсітного уменя.

Жрідло фотоґрафії: shutterstock.com

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі