Вітайте в ліпшых часах

Робити коментарь на кінцю календарьного рока собі дословно выжадує біланцію. Здорова біланція ниґда не плана, навеце в хворых (а тот рік досправды хворых) часах. Але не бійте ся, не будеме собі псути конець рока.

Дало бы ся довго писати, што неґатівне тот рік приніс. Много. Окрім іншого русиньскый рух стратив і єдного з найвызначнішых лідрів остатніх років, основателя нашого радія і порталу Богдана Ґамбаля.

То страта, котру будеме чути іщі довго. Нелем мы, в ансамблі lem.fm, але і в рамках цілого нашого руху. Но позітівным є, же діла, котры сотворив, продовжують дале. І мам надію, єм пересвідченый, же наперек многым „жычливцям“ будуть тоты діла продовжовати.

Но досправды, по складнім році є ліпше заміряти ся на веце позітівны справы. Кебы єм мав выбрати лем єдну, а оно їх было наперек планому року омного веце, пак є то кампань, котров Русины выразили свою єдность. Так потрібну, і так слабо менежовану через штруктуры Світового конґресу Русинів.

Кампань під назвов Сьме Русины, з котров пришов Округлый стіл Русинів Словенська і ословив і далшы партнерьскы орґанізації в державах, де жыють Русины, є міцным моментом 2020-го року. То не є лем великый одказ до внутра русиньской комуніты, іщі омного векшым є тот одказ про тых коло нас. Головно про тых, котры о нас не знають, про тых, котры нам сперають нашы права, про тых, котры нас не мають за єден народ, ці про тых, котры нам бісідують, же ани не сьме народ, лем сліпе черево з їх бріха.

Робити довєдна кампань, котра має перейти до другой фазы і „выпровадити“ так людей аж ку моменту, коли ся будуть списовати, окрім тых на Україні, што уж є, нажаль, фолклорнов традіційов наслідовників Київской Руси, ся за 30 років не доїднало на жаднім конґресі, не было то ани на жаднім фестівалі, на жадній гулянці, ани в жадных науковых книжках. Требало на то думку, і акціїспособны орґанізації, з котрых многы ани не суть в конґресі.

Самособов, успіх ці неуспіх кампані будуть може дакотры хотіти міряти резултатами списованя жытелів. Лемже то не так цалком правилне.

Резултаты списованя будуть дзеркалом веце факторів. Демоґрафії, силы асімілації в окремых державах, робочой міґрації до векшых міст, припадно до іншых країн. А буде то і біланція нашой 10-річной роботы. Цілой. Пак будеме годны може біланцовати, ці веце зробить фестівал під каждов вербов, або робота медій, робота освітня, котра не кінчіть остатнім аплавзом на сцені амфітеатру, але є безперерывна і безодкладна, потрібна цілый рік.

Но венрнийме ся ку кампані. То, же ся Русинам подарило теперь, докінця в так складных часах споїти, є по перше історічным пунктом, по друге є то мементом про конґрес, жебы зачав роздумовати, ці досправды мають в його складі быти законзервованы лем дакотры орґанізації, або ся має дати простор і новым членам, а головно новым думкам.

Часу на продуманя стратеґії не є вельо, бо якраз в слідуючім році бы ся мав одбыти далшый конґрес, котрый бы ся уж конечно мав актівніше рушати допереду.

Рік 2021-ый буде в европскых державах роком списованя. Прийдуть новы даны о тім, кілько нас є, або, ліпше повіджено, кілько людей собі усвідомлює свою русиньску ідентіту. По році пандемії хочу вірити, же собі будеме в тім слідуючім годны повісти: Вітайте в ліпшых часах!

Часах єднак здравшых, часах вернутя ку нормалнішому жывоту, але і часах, коли робота на русиньскій ниві і наша єдность принесе позітівны плоды і в подобі выслідків списованя.

Статя была написана як коментарь „Вступне до контроли“ лемківского радія lem.fm. Фото: pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА