Голосник

Владыка Мілан Стіпіч прияв єпіскопску хіротонію

В суботу 17-го октобра 2020-го року проходила єпіскопска хіротінія (рукоположіня) нового крижевацького єпархіалного єпіскопа, владыкы Мілана Стіпіча. Торжество проходило при дотриманю строгых протиєпідеміолоґічных наряджінь в єкстерьєровых просторах перед Катедралным собором  Пресвятой Тройці в Крижевцях, в Хорватії.

Як інформовала на своїм сайті Інформачна католицька аґентура (Informativna katolička agencija, IКА), головным святительом нового ґрекокатолицького єпіскопа быв ємерітный крижевацькый єпарха владыка Микола Кекіч. Вєдно з ним на нового єпарху поклали рукы і загребскый римокатолицькый архієпіскоп і метрополіта кардінал Йосип Бозаніч, а апостольскый нунцій в Хорватії Джорджо Лінґуа.

Участны єпіскопы з веце держав

На торжестві рукуположіня нового ґрекокатолицького єрархы брали участь і председа Хорватьской конференції єпіскопів римокатолицькый архієпіскоп задарьскый Желімір Пуліч, котрый мав і проповідь, єпіскопы візантійско-славяньского і латиньского обряду з Хорватії, Босны і Герецеґовины, Сербії – єпарха Ґеорґій Джуджар з Єпархії Святого Николая в Руськім Керестурі, Севереной Македонії, Австрії ці представитель Конґреґації про восточны церькви з Рима.

Участны были і єпіскопы з Мадярьска – высокопреосвященый владыка Філіп Кочіш, архієпіскоп метрополіта Гайдудорозькой архієпархії, і владыка Авел Сочка, єпарха ніредьгазькый. Так само на святочній події брав участь і апостольскый адміністратор Мукачівской єпархії владыка Ніл Лущак.

Тяжке бремено єпіскопской службы

На торжестві приговорив ся емерітный крижевацькый єпарха, головный святитель владыкы Мілана, Микола Кекіч.

„Добровольно єсь взяв на себе тяжке бремено єпіскопской службы од Папы Франціска і будеш потребовати много Божой благодати, жебы єсь міг успішно выконовати свою службу на славу Бога Отця і Сына і Святого Духа, і на духновне благо свого малого стада, віруючіх Крижевацькой єпархії в цілій Хроватії, Словенії і в Босні а Герцеґовині – Хроватів, Українців і Русинів. Три народы, три языкы, три духовны дідовизны. Обрядовы шпеціфікы, котры ся за остатні штири столітя появили в Крижевацькій єпархії, бы мали быти осторожно хоронены як штось про нас шпеціфічне, і треба ся рядити знамым высловом: Честуйте остатніх, будьте на себе горды!,“ повів у приговорі владыка Кекіч.

Духовне зновузроджіня

Почас торжества ся вже як новый рукоположеный єпарха приговорив участным і владыка Мілан. Тот бісідовав о духновім зновузроджіню єпархії.

„З великов надійов смотрю до будучности нашой єпархії в Крижевцях і тішу ся на дні духновного зновузроджіня. Хто хоче істинно наслідовати Хріста, неминучо стрітить ся з невольов і переслідованьом з боку світа. Но не страчайме надію. З Богом сьме все у векшыні, і все на боці переможців. Най суть нам на пути взором і підтримков многы нашы святы предкове,“ повів владыка.

Участны і представителі іншых церьквей

На єпіскопскій хіротонії в суботу брали участь і представителі державы ці іншых церьквей.

Меджі участныма были представителі Сербской православной церькви, Реформованой церькви, секретарька Канцеларії презідента Хорватії Міріям Катуліч, міністерка културы і медій а предсидателька владной комісії про односины з церьковныма общінами Ніна Облєн Коржінек, але і далшы представителі державных і містных властей.

Крижевацька єпархія

Крижевацька єпархія, котра має і русиньскых віруючіх, была основана у 1777-ім році, і є про ґрекокатоликів різных народностей, котры жыють на теріторії Хорватії, Словенії а Босны і Герцеґовины.  На початку 21-го столітя з той штруктуры одокремили ся дві єпархії – Єпархія Успенія Пресвятой Богородіці в Македонії і Єпархія святого Николая в Сербії, котра має свій центер в Руськім Керестурі.

Історічным центром єпархії є місто Крижевці в централній Хорватії, де і є Катедралный собор Пресвятой Тройці. Уряд єпархы і семінарія є днесь у столиці державы, в Загребі. Крижевацька єпархія мала за даныма із 2018-го року понад 21 тісяч віруючіх, 46 парохій, котры обслуговало 37 священиків. В єпархії было і 40 монахынь.

Владыка Мілан Стіпіч (1978 р.)  быв 18-го марца 2019-го року призначеный за апостольского адміністратора Крижевацькой єпархії, по тім, што з уряду єпархы одышов на емерітуру владыка Микола Кекіч.  8-го септембра 2020-го року го Папа римскый Франціск призначів за нового єпархіалного єпіскопа Крижевацькой ґрекокатолицькой єпархії.

Жрідло фотоґрафій: ІКА.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі