Вмер др Ігор Рыдзанич. Автор основного для студентів технічных шкіл підручника

На 81 році жытя вмер лемківскій вченый др інж. Ігор Рыдзанич (1941-2022), родом з Баниці. Автор основного для студентів технічных шкіл і академій підручника тыкаючого запису конструкциі, на котрым выховало ся пару поколінь будучых інжынєрів.

Ігор Рыдзанич вродил ся 5. лютого/фебруара 1941 рока в Баници к. Ізб в родині о. Михала Рыдзанича і Теклі з д. Коропчак. Был третім по черзі сыном, по найстаршым Семані, старшым Олегу. По ним на світ пришли іщы брат Штефан і сестры Любомира та Орина.

По выселіню родина Рыдзаничів замешкала в Хоміонжы в сьродскым повіті. По парох роках родина переносит ся на плебанию в Мальчыцях. Там покійный ходил до основной школы, зас середню і студиі кінчыл во Вроцлаві. Был науковым працівником Вроцлавской Політехнікы.

Лишыл по собі богатый науковый доробок звязаный з проєктуваньом і конструуваньом. Был автором дописів, рефератів, скриптів, підручників, рапортів, конференцийных выступлінь, аж і двох патентів. Загальні понад 50 публикаций.

Серед вшыткых студентів технічных учелен знаный был як автор основных підручників до констуркциі – Zapis konstrukcji: Podstawy та Rysunek techniczny jako zapis konstrukcji: Zadania.

Был активным членом православной спільноты во Вроцлаві, заанґажуваным в діяльніст Православного Стоваришыня ім. Апостолів Петра і Павла.

Похоронны богослужыня пройдут в катедральній церкви Пресвятой Богородиці во Вроцлаві заран, 4. лютого/фебруара, од 9:00 год. (в клепсидрі є блуд, як подала родина), пак усопшый зложеный буде в православній кватері на цмонтери в Мальчыцях.

Вічная памят!