У віці недожытых 68 років вмер у віторок, 14-го юла 2020-го року, во вечорных годинах єпарха Мукачівской ґрекокатолицькой єпархії – владыка Мілан Шашік. Інформовав о тім офіціалный сайт єпархії. Причінов смерти была тромбоза.
Монс. Мілан Шашік ся народив 17-го септембра 1952-го року в селі Легота в окресі Нітра, на Словакії. Од 1971-го до 1976-го року штудовав на Римокатолицькій кірілометодійскій богословскій факулті в Братіславі. Рукоположеный на священика быв 6-го юна 1976-го року. У 1971-ім році вступив до Місійной Конґреґації отців лазарістів, і в 1973-ім році зложыв вічны обіты.
Душпастырьску діялность выконовав наперед як каплан, пізніше як парох. Із позволіньом Святішого Престола, кедьже ся все інтересовав о восточный обряд, служыв у двох обрядах – візантійскім і латиньскім.
Од 1990-го до 1992-го року штудовав на Папскім теолоґічнім інштітуті Тересіанум в Римі. Од 1992-го до 1998-го року робив на Апостольскій нунціатурі на Україні. Пак быв єден рік директором новіціату Конґреґації отців лазарістів на Словакії. В конґреґації мав і далшы функції – провінціалный асістент, директор штуденату. В авґусті в році 2000 вернув ся на Україну і быв римокатольцкым парохом в Перечині.
Папа римскый Йоан Павел ІІ. го 12-го новембра 2002-го року выменовав за апостольского адміністратора ad nutum Sanctae Sedis (дочасного) Мукачівской ґрекокатолицькой єпархії і за тітуларьного єпіскопа бононьского. Єпіскопске рукоположіня прияв од Йоана Павла ІІ. в Базиліці святого Петра в Римі на Праздник Богоявленія за новым календарьом 6-го януара 2003-го року. Єпархію як адміністратор перебрав по владыкови Йоанови Семедійови.
В слідуючіх роках консолідовав обставины в Мукачівскій ґрекокатолицькій єпархії, основав новы парохії, збудовало ся множество новых храмів. Дня 17-го марца 2010-го року быв Папом римскым Венедіктом XVI. выменованый за мукачівского єпарху. Вічная память!
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі