Як поінформувал офіцияльный сайт вроцлавско-щеціньской єпархіі ПАПЦ, 5. листопада/новембра 2020 р. вмер о. митр. Михал Шляґа, долголітній парох православной парохіі Благовіщыня Пресвятой Богородиці в Мальчыцях на Нижнім Шлеску.
О. Михал Шляґа был Лемком. Вродил ся 25. липця/юлия 1953 р. в Пшемкові. В 1974 р. был рукоположеный на діакона, а неодолга на священника. В 1974-1978 рр. был парохом в Щецінку і Боболіцах, а од 1978 р. до 1981 р. служыл в Кошаліні. В 1981 р. был принятый до лодзіньско-познаньской єпархіі, де до 1985 р. был вікарийом лодзіньской кафедры і парохом во Влоцлавку.
13. вересня/септембра 1985 р. вернул назад до вроцлавско-щеціньской єпархіі, де од 16. листопада/новембра был парохом в Мальчыцях. Заєдно был парохом в Студзьонках (до 16. вересня/септрембра 2001 р.) і в Самбожу (до 19. червця/юнія 2006 р.).
Покійный більшіст свого жытя служыл серед выселеных Лемків і іх потомных. Вірныма в Мальчыцях, Студзьонках і Самбожу сут в переважаючій части Лемкы.
Посліднім часом радийо ЛЕМ.фм мало нагоду нагрывати богослужыня в мальчыцкій церкви, котры пак были трансмітуваны в рамках преносу недільных літургій. Бл. п. о. Михал Шляґа был прихыльником радия ЛЕМ.фм. При храмі находит ся принагідна таблиця з нагоды 65-літя істнуваня парохіі, на котрій є м.ін. інскрипция: Лемковино, і ту твоі діти.
Інформация про похорон буде внет опубликувана на єпархіяльным вебсайті.
Вічна Памят!
фот. www.diecezjawroclawsko-szczecinska.pl
Коментарі