Выникать зґрупованя теріторіалной співпраці ПСК, КСК і Закарпатьской области

Пряшівскый і Кошыцькый самосправный край основають вєдно із Закарпатьсков областнов радов Европске зґрупованя теріторіалной співпраці Вігорлат (Európske zoskupenie územnej spolupráce Vihorlat s r. o.).

Як інформовала Даша Єленьова, говоркыня Пряшівского самосправного краю, цільом є посилнити черегранічну співпрацу в реґіоналнім розвитку, културі, економіці, але і областях транспорту ці еколоґії. В рамках Европской унії піде лем о другу платформу того тіпу із україньсков участьов, а єдночасно то перше словацько-україньске зґрупованя свойой сорты.

Ініціатіва Пряшівского самосправного краю (ПСК), Кошыцького самосправного краю (КСК) із україньскым партнером – Закарпатьсков областнов радов, є подля говоркыні ПСК стратеґічный крок, котрый уможнить імплементацію ключовых проєктів у різных областях жывота. Основаня зґрупованя і членство схвалив крайскый парламент ПСК на своїм засіданю в понеділюк 18-го мая 2026-го року.

Нова капітола односин

„Евроске зґрупованя теріторіалной співпраці Вігорлат буде єдным із 93 такых згруповань діючіх в Европі, і лем друге на граніці Европской унії і Україны. Спринимаме то як вызначный інштрумент про розвиток співпраці і реалізацію конкретных проєктів заміряных на піднятя якости жывота жытелів, на котры будеме годны схосновати фінанції ЕУ, але і іншы ініціатівы а інштрументы підпоры,“ повів председа ПСК Мілан Маєрьскый.

Як далше додав пряшівскый жупан, проєкты мають быти цілены на розвиток турістічного руху, културу, шпорт, будованя і модернізацію біціґльовых стежок ці охрану жывотного оточіня. Зґрупованя Вігорлат за його словами одкрывать нову капітолу словацько-україньскых односин із прямым досягом на розвиток сполочного пригранічного реґіону, котрый буде мож розвивати новов формов.

Надвязаня на меджівладный договор

Зґрупованя Вігорлат не буде лем формалнов штруктуров, але выконным інштрументом співпраці. Його головнов задачов має быти реалізація проєктів. Піде головно о реґіоналный розвиток і інфраштруктуру із акцентом на розвиток ціклотранспорту, економіку і іновації, науку, баданя, турістічный рух і жывотне оточіня.

В темі людьскых джерел буде акцент даный на розвиток освіты, здравотной і соціалной опікы, але наприклад і на охрану културной дідовизны.

Основаня Европского зґрупованя теріторіалной співпраці надвязує на меджівладный Договор о черезгранічній співпраці меджі Словакійов і Українов із року 2000. Єдночасно є резултатом обовязків, котры выходять із Договору о співпраці із мая 2023-го року меджі ПСК і Закарпатьсков областнов радов. До ініціатівы залучів ся і Кошыцькый самосправный край, чім ся укріплять коордінованый приступ на шыршій теріторіалній уровни із оглядом на ґеоґрафічны, транспортны і общественны звязы із пригранічнов областьов на україньскім боці.

Еворпске зґрупованя теріторіалной співпраці є в Европі хоснованым інштрументом, котрый служыть на черьпаня фінанцій із проґрамів Евроской унії. Залученым реґіонам і публічным інштітуціям уможнює співпрацовати ефектівніше, реалізовати вєдно проєкты, простіше хосновати доступны фінанції і єдночасно посилньовати господарьску, соціалну і теріторіалну соналежность.