Высокопреосвященый Йона на одпусті у Водиці

Высокопреосвященый Йона Максим, пряшівскый ґрекокатолицькый архієпіскоп і митрополіта, є од віторка 10-го до четверьга 12-го юна 2025-го року на навщіві Єпархії святого Николая в Руськім Керестурі.

В рамках свойой офіціалной навщівы єпархії у віторок брав участь на одпусті у вызначнім про тамтешніх Русинів путницькім маріяньскім місці, котре называть ся Водиця, і є недалеко Руського Керестура.

„В тім маріяньскім святилищі, котре є звязом духовной родины скапчане з базиліков Santa Maria Maggiore, головный одпуст святкує ся на третій день праздника Пятьдесятніці, котрый ту называють Завітный день. Путникам приговорив єм ся в їх языку,“ написав на своїм офіціалнім сайті на сіті Facebook кір Йона.

Як інформовала аґентура Рутенпрес, на одпуст пришло велике чісло віруючіх, і быв то вже 172-ый Завітный день. Так само собі в тім році припоминають 165-ту річніцю од посвячіня церькви на тім місці.

Митрополіта служыв архієрейску літурґію вєдно із руськокерестурьксым єпархом – Преосвященым владыком Ґеорґійом Джуджаром, і далшыма священиками єпархії, священиками із Пряшівской єпархії, Крижевацькой єпархії і римокатолицькыма священиками.

Тото свято збогатив спів Церьковного хору Храму Успенія Пресвятой Богородіці із Коцура. Праздник закінчіли процесійов і обходом коло храму.