Высова з одремонтуваным престолом

Як подало Повітове Староство в Ґорлицях – закінчыли ся консерваторскы роботы в цервки в Высовій. Одобраня робіт одбыло ся в минулым тыжни.

В середу 13. листопада/новембра 2024 р. одбыло ся офіцийне одобраня консерваторскых і реставраторскых робіт памятникового выпосажыня православной цервки св. Архангела Михала в Высовій. В рамках задачы выремонтуваный был престіл з ІІ пол. ХІХ ст.

В контроли ефектів робіт участ взяли: член Заряду Повітового Староства Марек Людвін, Анджей Войцєховскій репрезентувал Выділ Розвитку і Інвестиций Повітового Староства в Ґорлицях, Воєвідскій Уряд Охороны Памятників в Кракові Делеґатуру в Новым Санчы репрезнетували Аґата Фатула та Марцін Назімек, зо страны Ґміны Устя Рускє присутны были Мария Манна і Ева Матушык, а як ґазда обєкту присутный был о. Марек Ґоцко, парох православной парохіі в Высовій. Выконавцю репрезентувала Тереса Пєньонжек.

«Працівникы, што вели роботы в храмі, зосередили ся на головным олтари – престолі, котрый походит з другой половины ХІХ столітя і єст центральным літургічным пунктом в церкви. Завдякы проведеным роботам, якы обнимали тіж естетичны і технічны аспекты, повело ся привернути олтарьови стабільніст і підкрислити богаты декоративны деталі. Завдякы тому привернено бывшу красу той памятниковой конструкциі, при захованю єй автентичности» – подано в комунікаті.

На ціліст задачы перезначено квоту понад 100 тис. зл, на котру зложыли ся: дотация з буджету Воєвідского Консерватора Памятників – 90 тис. зл, 5 тис. зл то підпертя Повітового Староства, зас парохія зо своіх середків доложыла коло 7 тис. зл.

Фот. www.powiatgorlicki.pl