Выстава о гуманітарній помочі ґрекокатоликів у Пряшові

В пятніцю 24-го фебруара 2023-го року буде точно рік од зачатку воєньской інвазії російской армії на Україну. Смутну річніцю припомянуть собі і ґрекокатолицькы віруючі.

Як інформовав Михал Павлишіновіч з Інформачного центра Пряшівской архієпархії, владыка Петро Руснак, апостольскый адміністратор Пряшівской архієпархії, позвав в тот день ку посту і молитві за покій і мір на Україні.

В Катедралнім соборі святого Йоана Крестилтеля в Пряшові в тот день владыка о 15.30 год. буде молити ся молебен на тото наміріня, по котрім буде слідовати панахіда за вшыткы жертвы той несмыселной войны.

„В рамках той молитовно-пєтной події одбуде ся і одкрытя выставы фотоґрафій, котры вкажуть реаліту войны, біженецькой крізы і помочі, котра была в повязаню з тым зреалізована з боку ґрекокатолицькых віруючіх,“ інформовав Павлишіновіч з тым, же выстава має назву Капка радости.

„В морі терпіня, котре война принесла практічно до каждой родины на Україні, коли многы родины пришли о своїх близкых, хоче тота выстава підкреслити смысел давати і жертвовати ся про слабых, бідных, терплячіх од войны. То має быти основный знак жывота хрістіана, котрый не жыє лем про свій добробыт, але видить потребы людей в нужді і поможе.“

Выстава має быти єдночасно і посилніньом про рішіня людей і далше помагати при потребах терплячіх на Україні.

В рамках одкрытя выставы выступлять із своїм сдідоцтвом отець Юрій Поповіч із свойов женов, котры вецераз абсолвовали путованя на выход Україны, до околіці міст Харків і Ізюм, де адресно передавали поміч людям, якых засягла война.

Духовне покровительство над выставов перевзяв владыка Петро Руснак вєдно із председом Пряшівского самосправного краю Міланом Маєрьскым.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА