Як можу помочы Украіні? #помічUA / ч. 6

Громадяне Украіны, котры лишыли своі хыжы през войну, котра нищыт іх державу, можут схоснувати поміч, котру ґарантуют державы Евросоюзу, в тым Польща. Увага на правный гачык!

Вартат перестеречы приізджаючых громадян Украіны, жебы подумали, ци хотят выступувати о статус біженця. Дає то одмінну правну ситуацию (без права до роботы, з невеликом грошовом помочом) порівнуючы до осіб, котры о реченый статус не выступлят.

Громадяне Украіны, якы втічут пред оружном аґресийом Путіна на Украіну, згідні з принятoм на засіданю Рады Міністрів в понедільок, 7. марця 2022 р., спецуставом о помочы громадянам Украіны мают право до тымчасовой охороны, котра дає право до леґального побыту протягом 18 місяців (рахуючы од 24. лютого/фебруара 2022 р.) з можливістю выдолжыня до трьох років. Можут тіж отримати ідентифікацийный номер (PESEL), котрый злегшыт ім доступ до діґітальных услуг, напр. жебы мати Довіреный Профіль. Украінці, котрых побыт в Польщы є залеґализуваный, мают доступ до здравотной опікы, едукациі, можут підняти роботу, мают тіж право до дакотрых соспільных доплат.

В примірі коли втікаючы выступуют о офіцийный статус біженця, значыт внескуют о медженародну охорону (рішыня наступує найчастійше до піл рока од дня зложыня внеску), то през першых 6 місяців тырваня процедур не можут підняти леґальну роботу. Тоту мож підняти аж по обнятю медженародном охороном.