Забыткы Юнеско – зроб знимку лемківской церкви і выграй конкурс

Креницкє Фотоґрафічне Товариство довєдна зо Стоваришыньом Приятелів Альманаху Мушыны оголашат фотоґрафічний конкурс, якого цілю є вказаня красы двох лемківскых церкви, котры сут вписаны на Світову Листу Спадковины Юнеско. Іде о грекокатолицкы храмы в Поворознику і Брунарах.

Конкурс є орґанізуваний в рамках ХVI едициі Архітектонічного Деталю Історичной Мушыньской Державы. Конкурсови дано мено «Забыткы Юнеско – штырі поры рока», прото знимкы можут вказувати красу храмів незалежні од часу выконаня фотоґрафіі. Як раз в округу історичной Мушыньской Державы находят ся речены дві церкви: св. Якова в Поворознику та св. Михала в Брунарах.

Oрґанізаторы ждут фотоґрафій, якы будут представляти будівлю церкви в полній подобі, в тым зовнишні і внутрішні деталі. При тым, цінным буде выкорыстаня специфічных елементів для поєдных части рока (прим. цікавы атмосферичны явиска або поры дня). Знимкы єдного автора можут представляти лем єдну пору рока.

Кажда зо стартуючых в конкурсі осіб може максимально загнати на адрес detalunesco@gmail.com до 9 знимок. Мож іх присылати до 31. мая т.р. Фінальны результаты будут оголошены по 11. червця/юнія т.р., коли то зыйде ся покликане орґанізаторами жырі. Окрем признаня поєдных місц, жырі заквалифікує декотры працы до поконкурсовой выставы. Головном нагородом за занятя першого місця є 500 зл. Дальшы два місця будут нагороджены квотами 400 і 300 зл.

Краса лемківскых храмів долго не была доцінена, головно в періоді вынятя лемківской меншыны спід права. Новы властителі церкви часто не дбали о іх стан, а поєдны дозваляли розберати. В початковых роках по выселінях Лемків вельо церковных забытків пропало на все. Єдным з авторів, котрий детально піднял ся описати тот проблем, є Ярослав Ґємза, якій посліднім часом печатал монументальний альбом «Церкви і іконы Лемковины».

Достойности деякы храмы достигли в червци/юнію 2013 рока, коли то 5 церкви з обшыри Лемковины было вписаных на Листу Світовой Спадковины ЮНЕСКО. Цертифікатом можут гордити ся церкви св. Михала Архангела в Туряньску, св. Якова в Поворознику, св. Параскєвы в Квятони, св. Михала в Брунарах Выжніх, Покровы Пресвятой Богородиці в Рыхвалді. В архіві радия ЛЕМ.фм найдете цикль проґрамів «Реґістер Забытків», де два одтинкы были посвячены як раз церквам в Брунарах і Поворознику.

Детальний реґулямін конкурсу найдете за мотузком.

фот. горі: кольорове (Брунары): Каміл Палюшек; чорно-біле (Поворозник): архів ЛЕМ.фм