Земля співат – Русины тіж

Днешня культура неконечно мусит быти презентувана лем на театральных дошках, або великых фестівальовых сценах, бо разом з розвитком інтернету, радия ци телевізиі годны сме того досягнути і там. Очывидно, найдут ся такы, што скритикуют тот напрям коштуваня культуры. Як раз, єдным з проґрамів, якій продукує словацка телевізия rtvs, є емітуваний од того рока новий розрывковий шов пн. Zem spieva, што в тлумачыню до русиньского має ся Земля співат. Є то дакус інчий шов, до якых сме привыкли, обзераючы комерцийны телевізиі, якы пожычают бодай вшытко, што добрі ся продає на американьскым континенті. Ту, словацка телевізия покусила ся сотворитити проґрам, якій в своій конструкциі буде навязувал до популярных шов, але його зміст дакус інчий, бо проґрам має задачу промувати домашній фольклор, што в того рода проґрамах є досправды дачым новым.

До проґраму, окрем конечных словацкых ґруп, поступили і русиньскы выконавці, якы дотепер сут высоко оцінюваны через проґрамове жырі. Подібні як в другых того рода проґрамах, складат ся він з поєдных етапів, а по каждым выступліню дахто з проґраму іде гет. Рішыня піднимают предовшыткым обзераючы, якы мают можніст голосувати через телефонічны відомости. В проґрамі Земля співат є Словация ґеоґрафічно поділена на три реґіоны: західню, середню і східню. Русиньскы выконавці самособом репрезентуют східню част державы.

В проґрамі од зачатку едициі можете позерати на два русиньскы факторы. Перший творит Русиньскє Тріо, на якє складают ся три молоды Русначкы, стараючы ся одтворювати поєдны части русиньского фольклору. Основателька ґрупы – Домініка Новотна, то студентка пятого рока в Інситуті русиньского языка і культуры Пряшівского Університету, на што мож позерати в фільмі долов, коли, як введіня до проґраму Земля співат, одвиджат Інститут і веде бесіды з каждом з дівок, якы творят Русиньскє Тріо. В выступі в чвертфіналі дівкы выступили в гуцульскым облечыню. Другым відео, котре залучаме долов, є уж выступ Русиньского Тріо в пілфінальных змаганях. Ґрупа поступила до фіналу, прото буде мож на ню позерати в найблизшу суботу, 8. квітня/апріля т.р.

Індивідуальным выконацьом, котрому на потребы выступу товаришат окремо гудакы, є русиньскій співак Штефан Штец, якій на штоден робит в словацкым радию Patria, в котрым м.ін. веде проґрамы посвячены русиньскым темам. Штец є тіж фольклористом і долголітнім членом ансамблю Горнад, котрий самособом взял участ в проґрамі. Ансамбль є офіцияльно словацкым колективом, головно заміряным на земплиньскій і шаришскій фольклор, але в своім репертуарі має тіж дакы русиньскы акценты. На Штефана Штеця, якій поступил до фіналу словацкого шов Земля співат, можете позерати в найблизшу суботу, 8. квітня/апріля т.р. Зато для Русинів буде то емоцийний фінал, коли будут мусіти выберати медже русиньскым солистом, а русиньскыма трьома фраірками. Долов, позерайте на два выступліня Штефана Штеця (чверт- і пілфінал).

Того рода проґрамы дают можніст робити дальшу успішну карєру. Добрым приміром є лемківскій целебрита Ігор Гербут, якій поступил до знаного в Польщы шов – Must be the music. Выграл, а днес в публичным просторі можеме чути лемківскы співанкы. В листопаді/новембрі 2016 р. до фіналу телевізийного шов ČESKO SLOVENSKO MÁ TALENT перемогла знана ґрупа Грдза, яка в пілфінальній части проґраму выступила зо словацко-русиньском співанком Taka sa mi páči / Така ся мі любить. З ґрупом выступила Сусанна Яра, яка в русиньскым світі знана є з того, же в вынятковий спосіб выспівує поезию Петра Мурянкы.

На змаганя в фіналі конкурсу можете позерати в найблизшу суботу нажыво м.ін. за тым мотузком.