Зъізд селян – Чарна, Снітниця, Ставиша

В днях 15.-18. червця/юнія т.р. з чужыны на Лемковину приде громада бывшых селян трьох лемківскых сел. Орґанізаторы – Андрий Перегрим та Кружок Стоваришыня Лемків в Пшемкові – просят на подію пн. «Зъізд селян – Чарна, Снітниця, Ставиша». Выізд бывшых жытелів тых лемківскых сел, а головно іх потомных, є предовшыткым выразом спільнотовой памяти про траґедию нашого народу.

В рамках выізду присутны будут мати нагоду одвидіти не лем рідны села, але шырше обшыр Карпатской Руси. Подля проґраму, в четвер 15. червця/юнія, автокар з Пшемкова заіхат на Шляхтівску Русь, де беручы участ в подіі будут познавати крайчык найдале на захід высуненой части Лемковины, ай сплынут Дунайцьом. На другій ден (16.06) навіщникы одвидят Высову і конечно святе місце лемківскых Русинів – Гору Явір. Пак підут на західню Пряшівску Русь до сел Чырч і Камюнка, де мают ся інтеґрувати з тамтышніма родаками, помагати ім в тым буде ансамбль «Барвінок», якій на заході Польщы постійно гостит в рамках Лемківскых Ватр на Чужыні.

В суботу, 17. червця/юнія, в чарняньскій церкви св. Димитрия буде правлена Свята Літургія, по ній заміряно зложыти квітя на могылах предків, што спочывают на сельскыx цмонтерях. Самособом, тот ден буде высловом памяти про злочын выгнаня – по богослужынях пройде академія присвячена 70. річниці Акциі «Вісла». В послідній ден, при нагоді повороту родаків до місця іх теперішнього прожываня, одвидят они Явожно, де при свіжым памятнику присвяченым вшыткым Лемкам взязненым в лаґрі в наслідсві акциі «Вісла» покладут квітя. Продолжана має быти тіж красна традиция започаткувана 29. квітня/апріля т.р., т.є. кладіня під лемківскым памятником каміня з Лемковины з підписаныма назвами сел.

Детальны інформациі найдете долов на афішы.