Знаме кандидаткы на Miss World Rusyn

До Русиньского Фестівалю во Свиднику штораз ближе. Згідно з заплянуваном орґанізаторами акцийом, до кінця квітня/апріля т.р. білеты на подію можете придбати по 6 евро, а уж од мая вступне на фестіваль підскочыт до 9 евро. Тогорічна пята едиция найбільшого фестівалю Русинів во світі є такой найдолшом того рода подійом, понеже тырват цілий тыжден – од 22. до 28. мая. Каждий рік, окрем сценічных выступлінь, головний орґанізатор, якым є Окресна Орґанізация Русиньской Оброды во Свиднику, старат ся збогатити фестіваль о новы подіі і акциі, котры пройдут в його рамках. Того рока, перший раз на фестівали, явит ся нова атракция – выборы найкрасшой Русинкы – Miss World Rusyn.

О акциі од парох місяців шыроко заявляют не лем орґанізаторы, але м.ін. тіж нашы медиі (ЛЕМ.фм тримат медияльний патронат над цілом подійом). Днес приносиме віст, што знаны сут уж мена кандидаток, якы в суботу, 27. мая 2017 р., во свидницкым амфітеатрі, будут бороти ся о мено той найкрасшой. До конкурсу стане 10 кандидаток з пятьох держав світа, хоц початково было замірене, жебы кажду державу, в котрій прожывают Русины, значыт Словацию, Польщу, Чешску Республику, Украіну, Мадяры, ЗША, Канаду, Сербію, Хорвацию і Румунію, репрезентувала єдна кандидатка. На жаль, конец-кіньцом до участи в конкурсі зголосили ся лем охочы з Чешской Республикы, Словациі, Сербіі, Зъєднаных Штатів Америкы та Румуніі. Тогорічне шов має іщы більше звернути увагу світа на Русинів. На переможницю жде фінансова нагорода – 2000 евро.