Голосник

Чорнорікы будут мати свою видокову вежу

По успішным одкрытю стежкы, яком над деревами мож од недавна ходити в Креници, обзераючы прекрасну околичну панораму, штораз більше ініциятив того рода приходит на думку декотрым локальным самоурядам ци інчым інституциям. Чорнорікы коло Коросна замріяли вознести видокову вежу.

В Чорноріках, єдным зо сел Коросняньской Руси, має быти збудувана 13-метрова видокова вежа, з якой буде мож видіти велику обшыр м.ін. середньой Лемковины. Будова, котра уж рушыла, ведена єст в рамках проєкту «Карпатскы видокы на трансграничным туристичным пути Корчына – Стропків» рыхтуваного ґміном Корчына і містом Стропків на Словациі. Вознесіня вежы є першом зо списку задач проєкту. Подібна вежа буде побудувана і в Стропкові.

Окрем того в плянах єст іщы біциґльова траса долгости 34 км, маюча разом з вежом активізувати туристичный рух в реґіоні.

Дальше буде написана аплікация в трьох языках (по польскы, словацкы і анґлицкы), яка допоможе глядати найбарже інтересуючых туристичні місц. Будут тіж орґанізуваны польско-словацкы культурны і спортово-рекреацийны подіі по обох странах границі. Ціла вартіст проєкту то кус більше як 441 тис. евро, з чого 85% покрыют фундушы з Евросоюзу.

Подібна, лем дакус высша – 34-метрова, видокова вежа была збудувана і одкрыта в 2018 році на горі Цергова, котра возносит ся над лемківскыма селами Терстяна і Завадка Рыманівска.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі