Голосник

Дзвінниця як колиси. Внет завершыня реставрациі обєкту в Полянах Суровичных

0
В минулым тыжни ґрупа волонтерів завершыла головны реставраторскы роботы при муруваній дзвінници в лемківскым селі Поляны Суровичны. Тепер дзвінниця є уж вкрыта і вінчыт ю баня. На другій рік буде іщы покрыта бляхом.

Од 2012 р. в селі ведены были роботы маючы на ціли ратуваня дзвінници, яка колиси стояла при деревяній церкви св. Михала Архангеля. Іх результат є такій, што днес дзвінниця свойом красом навязує до передвыселенчых часів, до 40. р. ХХ ст.

Соспільна ініциятива довела протягом тых років до одбудовы і зміцніня поваленых мурів, а конец-кінцьом до покрытя дзвінниці дахом. Новий дах з баньом побудуваний был на взір даху і бані, якы ся находят над притвором церкви в Ославици. Фінальний проєкт зрыхтувано інспіруючы ся як раз тым сусіднім обєктом.

Посліднім пунктом в цілій реставрациі має быти обитя цілой повалы і бані мідяном бляхом. В плянах орґанізаторів є тіж побудуваня в середині дзвінниці конструкциі, яка дозволит завісити внутрі дзвін. Припомнийме, што в липци/юлию до екіпы волонтерів трафил подаруваний римокатолицкыма монашками з Яслиск дзвін сперед девятдесятьох років, котрий правдоподібно походит з місцевой парохіяльной церкви в Полянах.

Влони до Полян повернули два кресты з загыбшой грекокатолицкой церкви св. Михала Архангела. Знищены кресты піддано реновациі і тепер єден з них вінчыт новопоставлену баню, а другій находит ся на стіні дзвінниці.

Підсумуваня проєкту мож чытати в офіцияльній летучці. Протягом років на ремонт збераны были добровільны фонды.

фот. facebook.com/polanysurowiczne

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар