Голосник

Підсумуваня Лемківской Ватры на Чужыні

0
В неділю, 9. вересня/септембра 2018 р., на ватряным поли в Михалові проходило офіцийне підсумуваня послідньой, ХХХVIII Лемківской Ватры на Чужыні, яка одбыла ся в днях 3.-5. серпня/авґуста т.р.

В стрічы брали участ члены Головного Заряду Стоваришыня Лемків, члены поєдных кружків орґанізациі і дальшы заприязнены особы, якы того рока помагали при рыхтуваню ватры. Ведучий СЛ, Андрий Копча, высловил офіцийны подякуваня вшыткым, котры трудили ся при тогорічным фестівали.

При нагоді підсумуваня, Копча передал на рукы, неприсутного на ватрі, дра Ярослава Хомяка почестну грамоту з нагоды 70. річниці народжыня. Др Хомяк в попередніх каденциях был активным членом орґанізациі, мал фукнцию ведучого Головной Ревізийной Комісиі.

Протягом стрічы заспівано Многая Літа і для ведучого СЛ, Андрия Копчы. Днес, 10. вересня/септембра, долголітній ведучий стоваришыня кінчыт 64 рокы. Як высловил при нагоді вчерашньой стрічы, є то уж його послідня каденция на становиску председы той найстаршой повыселенчой лемківской орґанізациі в Польщы.

Орґанізаторы розправляли про пляны на будучий рік, новы інвестициі і модернізацию сцены. Того дня прошло тіж короткє засіданя ГЗ СЛ.

фот. Мирослав Воргач

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар