Голосник

Початок шкільного рока в Рускій Бурсі

0

6. жолтня/октобра т.р. в Рускій Бурсі школяре ґорлицкого повіту витали новий шкільний рік. В подіі, як все, участ взяли діти і молодіж, котры в своіх школах вчат ся лемківского языка.

Того рока в акциі взяло участ 120-ох учеників зо шкіл в Высовій, Ганчовій, Баници, Брунарах, Ґладышові, Устю Рускым, Снітници, Бодаках і Санковій. Занятя з лемківского языка ведут в них Анна Рыдзанич, Варвара Дуць, Орина Гутиряк та Мирослава Дубец.

Подія мала едукацийно-забавовий характер. На самым початку діти і молодіж стрітили ся з єдным з найзнаменитшых лемківскых писменників, поетів, учытелів і діячів – з Петром Трохановскым. Мурянковы творы обовязково являют ся на каждым етапі вчыня, што більше, каждий школяр науку рідной бесіды зачынат як раз од лемківского букваря авторства того літерата. Ініциятива стрічы з Петром Мурянком вышла од самых учеників, котры вчас лекций, кєд познавали його творы, біоґрафію, запрагнули на своі очы видіти того знаменитого чловека. Пан Петро привитал молоде поколіня з великым ентузиязмом і радістю. Не крыл зачудуваня з чысла присутных. Прочытал пару творів і оповіл про своі молоды, шкільны рокы.

Пак діти были поділены на віковы ґрупы і розышли ся по бурсяных салях, в котрых зорґанізувано для них розмаіты варштаты. Найстарша ґрупа мала лексикально-языковы варштаты, якы вела МонікаТылявска, наймолодшы під кєрівництвом Андрия Трохановского занимали ся співом, а третя ґрупа прібувала своіх творчых сил на плястичных занятях веденых Якубом Зиґмунтом.

Варштаты мали інтеґрувати молоде лемківскє поколіня, але тіж і вчыти хоснувати лемківскій язык в практиці. Рівен послугуваня ся лемківскым в поєдных школах єст барз зріжницюваний, але тоты, котры сут іщы на початку свойой языковой дорогы, барз радо вчыли ся новых слів од тых барже досвідченых. Повторювали голосно новы слова і звороты. Не ганьбили ся, же не знают, але з охотом принимали нове.

По активні проведеным часі вшыткы были прошены на почастунок. На конец при акомпанияменті гушель вшыткы разом, як пристало на Лемків, присіли при співі.

Близко 15.00 год. ученикы вернули дохыж з усміхами на ґамбочках і новыма досвідчынями. Певно неодолга придут на дальшы подіі до Руской Бурсы.

[ngg_images source=”galleries” container_ids=”250″ display_type=”photocrati-nextgen_pro_blog_gallery” override_image_settings=”0″ image_quality=”100″ image_crop=”0″ image_watermark=”0″ image_display_size=”800″ image_max_height=”0″ spacing=”5″ border_size=”0″ border_color=”#FFFFFF” display_captions=”0″ caption_location=”below” ngg_triggers_display=”always” captions_enabled=”0″ captions_display_sharing=”1″ captions_display_title=”1″ captions_display_description=”1″ captions_animation=”slideup” order_by=”sortorder” order_direction=”ASC” returns=”included” maximum_entity_count=”500″]

Фот. Варвара Дуць

Шеруй.

О авторі

Моніка Тылявска

Абсольвентка росийской філолоґіі з русиньско-лемківскым языком Педаґоґічного Університету в Кракові. Член Стоваришыня Руска Бурса в Ґорлицях. В лемківскым середовиску барже знана як Настка. Любителька Лемків і іх культуры. Єдина Полька в редакцийным ансамбли.

Коментар