Голосник

«При джерелах» – третій раз на Лемковині

0
Уж третій раз одбуде ся подія, котра помалы вписує ся в ґрафік цикличных артистичных подій на Лемковині. То наступна едиция Медженародного Музычного Фестівалю «При джерелах», котрий буде проходил в днях 13.-16. вересня/септембра 2018 р. в парох місцевостях. Його основательом, директором і орґанізатором єст знаний во світі гушляр – др Мариюш Мончак.

Традицийом і формулом фестівалю єст переплітаня світовой клясичной музыкы з лемківском поезийом. Зрештом самы місця, де будут ся одбывати поєдны фестівальовы пункты проґраму, шырше-узше звязаны з Лемками і Лемковином. Фестіваль «При джерелах» зачне ся міцным лемківскым акцентом – 13.09 в креницкым Новым Здройовым Домі одбуде ся презентация найновшой книжкы Петра Мурянкы з тлумачынями польской поезиі на лемківскій язык. Дальше, враз з Мариюшом Мончаком, лемківскій поета і тлумач выступит на музычно-поетицкым вечері в креницкым костелі в центрі міста.

Тогорічна едиция фестівалю остане іщы на ден в Креници, але пак перенесе ся до другых місц, приходячы до амфітеатру в Здройовым Парку в Высовій, в церкви на св. Горі Явір, церкви в Полянах, зас в Креници і на конец до церкви св. Архангела Михала в Брунарах датуваной на 1797 рік, котра перед пятьома роками была вписана на Листу Світовой Спадковины ЮНЕСКО. Находит ся тіж на Пути Деревяной Архітектуры в Малопольщы.

В імени орґанізаторів – Євы і Мариюша Мончаків та Фундациі «Арс Актіва» – просиме на подію. Деталі найдете долов. А в меджечасі, можете пізріти на ґалерию знимок з першой едициі фестівалю авторства Петра Басалыґы.


Др Мариюш Мончак то гушляр з лемківскыма коренями (його родиче походят з Береста). Нич выіхал за океан студиювати в Ню Йорку і Монтреали, был учеником выдатного музыка і педаґоґа, Станіслава Гайзера. Як солиста і камералиста выступувал на найбільшых сценах світа. Днес, окрем концертуваня і нагрываня для знаных фоноґрафічных фірм, орґанізує концерты поважной музыкы.

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар