Другій теледиск Христины Соловій то «мілийонер»

Другій теледиск, знаной – помалы не лем на Украіні – співачкы Христины Соловій остал інтернетовым «мілийонером». Уж поясняме, о што іде.

В днешніх часах, вєдно зо скорым поступом і што раз більшій домінациі віртуального світа, такой вшытко, што тыкат ся нашого жытя, є консумуване і выставляне в інтереті. Такы принципы перебитя ся до векшой публикы хоснуют і (або головні) артисты – музыкы. Днес, такой каждий твір мусит ся найти в сіти, а часом і до той шумной музыкы творит ся іщы шумнійшы теледискы. Співачка лемківского походжыня – Христина Соловій – пішла тым самым путьом, што принесло ій великій успіх.

Теледиск до лемківской пісні «Під облачком» єст другым офіцияльным, по выграню державного шов через Соловій. 15. марця т.р., в сервісі YouTube выбило му чысло єден мілийон одкрыть. Є то великій успіх, не лем про саму Христину Соловій, але і про цілу сучасну лемківску музычну культуру. Автором слів до пісні «Під облачком» є білцарівян Семан Мадзелян, а музыку написал його єдносельчан – Маестро Ярослав Трохановскій.

Сеса екранізувана компрозиция є частю дебютантского альбому «Жива вода». На платни находит ся 12 пісен – 2 авторскы Христины і 10 народных, з чого аж 9 то русиньскы пісні з Лемковины, до котрых свою аранжацию приправил знаний украіньскій музык Святослав Вакарчук.

Перший теледиск Соловій до авторского твору «Тримай» был запрезентувний 8. квітня/апріля 2015 рока і днес виділо го більше як три мілийоны оглядачів. Спомнений – до лемківской пісні «Під облачком» – вказал ся світу неціле піл рока тому, 22. жолтня/октобра 2015 рока і по так короткым часі дотер до мілийоновой публикы.

Баба Христины Соловій народила ся на Лемковині, а сама артистка через три рокы співала в хорі «Лемковина» зо Львова.