Лавка при гробі Добряньского. О три тыжні одкрытя пропамятной таблиці

На сельскым цмонтери в Чертіжным на Пряшівскій Руси поставлены были лавкы. Єдна з них находит ся близко гробу Адольфа Добряньского, інформувало село Чертіжне.

Новы лавкы подарувал Сергій Запотоцкій. Находят ся они медже гробами на цілым теметові. Єдна з них одтепер стоіт напроти гробу А. Добряньского, будителя Русинів, котрого влони припоминана была 200. річниця народжыня. Одвиджаючы місце спочынку будителя, мож присісти попри його памятнику.

2017 р. был выголошений плятформом Округлого Стола Русинів Словациі як рік Адольфа Добряньского (1817-2017). Протягом того часу на Пряшівскій Руси, а самособом в Чертіжным проходили подіі орґанізуваны в памят того вызначного політика і реформатора не лем в істориі Русинів. В марци минулого рока Общество св. Йоана Крестителя торжественно почало подіі повязаны з ювілейом Добряньского. В тот ден по Божескій Літургіі в поблизкым грекокатолицкым храмі была на прицерковным теметові одслужена панихіда в памят покійного. В грудни/децембрі 2017 р. в Пряшові офіцийно завершено ювілейний рік А. Добряньского.

Пропамятна таблиця од Общества Колысочка

На 8. липця/юлия 2018 р. заплянуване є святочне одкрытя пропамятной таблиці будительови А. Добряньскому. Як інформує Обчаньскє Здружыня Колысочка, фонды на тоту ціль были збераны в періоді од половины мая 2017 р. до початку 2018 р. Повело ся назберати 2500 евр.

Святочне одкрытя таблиці зачне ся панихідом близко гробу будителя, а скінчыт короткым культурным проґрамом в сали Культурного Дому в Чертіжным. В рамках выступлінь запрезентуют ся русиньскы колективы і солисты. Модератоком подіі буде предсідателька Общества Колысочка, Люба Кральова.

Авторком пропамнятной таблиці є академічна сохарка Єва Потфайова, дівка выдатного словацкого фізика русиньского походжыня, Діонізия Ільковіча. Спілорґанізатором подіі є Сельскій Уряд в Черіжным.