Любіньска парохія просит на Ден Копальника

Лемкы не лем тепер роблят чысленно в копальництві, але робили в тым фаху уж більше як сто років тому, коли то одходили за хлібом за велику млаку. Значыт – традиция копальництва серед Лемків (парадоксальні для люди гір) єст дост міцна.

Очывидно, по выселіню нашых предків на Нижній Шлеск, коли лем найдено поклады міди, штораз більше Лемків находило роботу в одкрываных майнах.

Од парох років Свято Копальників є торжественно одзначане серед громады православной парохіі св. Тройці в Любіні. Каждого рока 4. грудня/децембра, коли за григорияньскым календарьом выпадат праздник покровителькы копальників – св. Варвары, а за юлияньскым свято Введіня во храм Пресвятой Богородиці, вірны любіньской церкви возносят молитвы за гірничый стан.

Молитва з владыком і капеляном

Православна Парохія в Любіні уж рыхтує ся до тогорічного Свята Копальників. Як раз парох той церкви – о. прот. Богдан Репела, был під конец листопада/новембра минулого рока менуваный владыком Юрийом православным Капеляном Копальництва вроцлавско-щеціньской єпархіі ПАПЦ.

О. Репела од парох років орґанізує при любіньскій парохіі святкуваня того дня. По перше зато, же Любін находит ся в самым центрі ґлоґівско-любіньско-ліґницкого округу міди, а по другє – серед вірных о. Богдана Репелы єст вельох копальників, якы наштоден роблят в компаніі KGHM.

Тогорічны святкуваня будут вынятковы за справом того, што першый раз на 4. грудня/децембра до копальників і іх родин приде з молитвом і благословліньом вроцлавско-щеціньскій пастыр і ординарий Польского Войска, архієпископ Юрий. Богослужыня зачнут ся в любіньскым храмі о 09.00 год.

Владыка помолит ся за вшыткых копальників і іх родины. Професия тота не єст легка і часто має неґативны наслідства для здоровля, аж і є небезпечна для жытя. Прото треба копальникам желати: «выіхати тілько раз горі, што зъіхати долов».

Ден Копальника на Нижнім Шлеску

Одкрытя руды мiди в любiньскым рейонi в марци 1957 р. спричынило, што вельох Лемкiв, выгнаных з Лемковины на захiдні землі в 1947 р., зачало дiяльніст в любiньскым мідьовым комбінаті на ріжных становисках.

Од того моменту каждого рока 4. грудня/децембра є для них вшыткых дньом вынятковым, припоминаючым о людях звязаных з копальництвом i iх трудах нелегкой роботы, кєд же на тот ден припадают два праздникы – подля тзв. нового і старого стилів.

За тоты вшыткы рокы в ґлоґівско-любіньско-ліґницкым комбінаті робило вельох Лемків. Серед копальників, якы каждого рока берут участ – мож сміло речы – в лемківскых святкуванях того дня, сут такы, што уж пішли на пенсию, але сут і такы, што аж недавно зачали свою роботу в майнах KGHM.

В радию ЛЕМ.фм мали сте нагоду стрітити ся з копальниками Марияном Шкуратом, Любомиром Горощаком ци Адамом Гербутом.