Нагороды ім. Р. Райнфуса вручены

23. вересня/септембра т.р. в Каштели в Шымбарку передано Нагороду Малопольского Воєвідства ім. Романа Райнфуса.

Премію ім. Р. Райнфуса признає ся за особливы успіхы в обшыри захованя локальной культуровой достоменности в Малопольщы. Того рока за активне заанґажуваня в охорону вшелеякых елементів локальной культуровой спадковины першу нагороду отримала Михалина Войтас – знавчыня народной культуры і кєрівничка Ансамблю Пісні і Танця «Ляхы», другу премію передано лемківскому діячови – Павлови Стефановскому, а третя премія припала Дариюшови Жезьнікови – кєрівникови Ансамблю Долина Попраду з Певничной. Лавреаты одобрали выріжніня і ґратуляциі з рук Лешка Зеґзды – члена Заряду Малопольского Воєвідства.

Павел Стефановскій згромадил найбільшу колекцию народного облечыня та документацию традицийных лемківскых співанок і танців, є він і єдным з найвызначнійшых русиньскых сучасных писменників і поетів. Одбераючы нагороду ім. Романа Райнфуса, вырецитувал єден зо своіх вершів.

Фот. Якуб Зиґмунт