Не буде Економічного Форум, але буде інче: CYBERSEC в Креници

В днях од 1. до 3. вересня/септембра Крениця зас буде простором дебаты о найважнійшых цифровых проблемах і можливостях, перед якыма стоят европейскы міста і реґіоны. В курорті одбуде ся конференция CYBERSEC, вчас котрой експерты в обшыри цифровой безпекы будут глядати одповіди на потребы сучасной економікы. Головным партнером конференциі єст Малопольскє Воєвідство.

Єдном з тем буде приспішыня цифризациі, якє выкликала пандемія, і звязане з тым звекшыня можливости атаків в віртуальным просторі. За Пресовым Бюром Маршалківского Уряду Малопольского Воєвідста – значыня бесіды о безпеці в сіти єст більше як перше, кєд же проблемы реального світа переносят ся тепер до сіти.

Продолжыня традициі орґанізуваня подіі о медженародным значыню

Конференция має дати передуманы одповіди на сучасны проблемы звязаны з будучыма технолоґіями. Цілю подіі єст вказати, же основом сучасной економікы єст цифрова безпека.

Форма тогорічной креницкой подіі в великій мірі є вымушена квестиями безпекы, той здравотной, як і фінансовой. Мимо вельох противности, самоуряд воєвідства хоче, жебы Крениця была ґаздом подіі о медженародным значыню, котра поможе формувати господарку будучности в Малопольщы. Припомнийме, што по роках орґанізуваня в курорті Економічного Форум, подію тоту перенесли до Карпача.

Сут на ТАК

Нове выданя медженародной стрічы в Креници буде вызначником мериторичного напряму дальшых едиций подіі, котры зосереджат ся довкола м.ін. новых технолоґій, цифризациі процесів і услуг та сучасной господаркы опертой на науковым потенциялі.

14. липця/юлия проходила стріча з Науковом Радом, ректоры і представникы 14 высшых учелен з Малопольщы позитивні і з ентузиязмом заопініювали новый формат осінньой подіі, звязаной так само з цибербезпеком, як тіж з Европейскым Біговым Фестівальом.

Фот. malopolska.pl