Новий малопольскій воєвідскій капелян пожарництва - з Ґладышова! - lem.fm

4. січня/януара т.р. Православний Войсковий Ординарий, владыка Юрий (Паньковскій), в порозумліню з владыком Паісийом, єпископом ґорлицкым, покликал о. Аркадия Бараньчука з Добровільной Протиогньовой Стражы в Ґладышові на функцию малопольского воєвідского капеляна пожарництва.

Отец Бараньчук в ґладышівскій єдиниці добровольців служыт як актывний пожарник од 1. квітня/апріля 2004 р. Скінчыл основне єдноетапове школіня стражаків ратівників ДПС, мат тіж управніня до кєруваня автами в катеґориях А, Б, Ц, Д, Е.

За выріжняючу діяльніст для розвитку протиогньового сохраніня был одзначений 16. жолтня/октобра 2012 р. Бронзовым Медальом за Заслугы для Пожарництва.

Наштоден, о. Бараньчук єст парохом в парафіях в Ґладышові і Ждыни та директором Осередка Милосердя Елеос в Ґладышові. Шырше о єґомостю писали сме при нагоді інформациі про голосуваня в плебісциті Чловека Рока 2015, до которого о. Бараньчук єст номінуваний. Нaйдете єй гев.