Свято Копальників. Лемківску делеґацию поздоровил владыка Юрий

Традицийно, 4. грудня/децембра вшыткы копальникы і працівникы повязаны з компаніями од угля і міди празднували своє найважнійше свято – Ден Копальників, якій признаный єст в ден покровителькы копальників – св. Варвары.

Серед лемківскых копальників свято є все шыроко припоминаме, кєд же вельо з Лемків жыючых на обшыри Нижнього Шлеска робит наштоден в компаніі KGHM.

Традицию святкуваня возродила православна парохія св. Тройці в Любіні. Місцевый парох, о прот. Богдан Репела в 2021 р. был призначеный владыком вроцлавско-щеціньской єпархіі ПАПЦ Юрийом за православного Капеляна Копальництва вроцлавско-щеціньской єпархіі.

Тогорічны святкуваня зачали ся уж 1. грудня/децембра, коли лемківска делеґация копальників, на запрошыня владыкы Юрия, брала участ в стрічы в єпископскій резиденциі во Вроцлаві. Окрем о. Богдана Репелы, присутны были лемківскы копальникы: Мариян Шкурат, Любомир Горощак і Адам Гербут.

Владыка поздоровил копальників з іх святом. Репрезентация любіньскых копальників высловила желаня взяти участ в будучым поломничестві і празднуванях свята Преображыня Господнього на Святій Горі Ґрабарці, долучаюы тым самым до другых делеґаций мундуровых служб.

4. грудня/децембра в любіньскым храмі были одслужены святочны богослужыня. В тым дни за східнім календарьом то праздник Введіня во Храм Пресвятой Богородиці, за західнім то як раз памят св. Варвары. В тогорічных православных святкуванях взяли участ м.ін. Начальный Директор KGHM дс. копальництва Кшыштоф Порембскій, Директор дс. продукциі Рафал Пепковскій, Директор дс. працовничых з одділіня Польковиці-Сєрошовиці Йоан Козубскій, ци Полномічный дс. спілпрацы з самоурядами Теодор Габура.

Окрем выміченых прусутны были дальшы представникы ріжных коплальняных функций, а тіж репрезентанты локальных самоурядовых власти – як війт ґміны Любін Тадеуш Кєлян. Телевізия KGHM вела трансмісию тогорічного Свята Копальників.

Проповід выголосил капелян копальників – о. Репела. В храмі был одчытаный лист од архієпископа Юрия.

О. Богдан Репела, як православный капелян копальників і Ґенеральный Гоноровый Нижньошлезскій Директор Православных Копальників (Generalny Honorowy Dyrektor Górniczy Prawosławny Kapelan Górnictwa) брал участ в подіях святкуваня Дня Копальників, якы в компаніі KGHM зачали уж 29. листопада/новембра. В проґрамі одбывали ся ріжого рода акциі – як святочна академія ци барбурковый похід улицями Любіна.

Одкрытя руды мiди в любiньскым рейонi в марци 1957 р. спричынило, што вельох Лемкiв, выгнаных з Лемковины на захiдні землі в 1947 р., зачало дiяльніст в любiньскым мідьовым комбінаті на ріжных становисках.

В радию ЛЕМ.фм мали сте нагоду стрітити ся з копальниками Марияном Шкуратом, Любомиром Горощаком ци Адамом Гербутом.