Труд Ольгы Прокоп доцінений

27 мая т.р., вчас ІХ Бієнале Лемківской/Русиньской Культуры в Креници, Ольга Прокоп з Чынадієва на Підкарпатскій Руси была была оголошена лавреатком преміі ім. Василя Турока-Гетеша за 2016 р. Як написал Штефан Лявинец, предсідатель Світовой Рады Русинів, оцініня єст за досягнуты вызначны результаты при розвитку, популяризациі і презентациі русиньской культуры во вшыткых єй аспектах.

Ольга Прокоп вродила ся 6. вересня/септембра 1940 р. в селі Крива недалеко Хусту, в родині Кірила Прокопа – русиньского діяча і посла до парляменту першой Чехословацкой Республикы. За свою прорусиньску і проправославну діяльніст был він осуджений в другым мараморошско-сіґетскым процесі, а по завлащыню Підкарпатской Руси Совітскым Союзом был вязнений совітскыма влястями.

Нагороджена Ольга Прокоп єст професийном культурном і долголітньом соспільном діячком, та учытельком молодых ґенераций в селі Чынадієво. Роками вчыла русиньского языка і культуры в недільных школах, орґанізуваных Штефаном Чепом на обшыри Підкрапатской Руси, спілосновала і спілпрацувала з чысленныма музычныма ґрупами. В своіх діянях консеквентно дає притиск не лем на артистичны, але і патріотично-выховавчы аспекты і такій же зміст творчости. Сама співала в ґрупах – «Чынадіівка», «Бабчына співаночка» і в тріо «Червена ружа». Радо іздит з концертами по цілій Карпатскій Руси.

В 2015 р. торжествувала довєдна з Лемками Ден Русинів на Лемковині, а єй ансамбль прикрасил співом і русиньском поезийом тото свято. Ольга Прокоп єст автороком книжок «Летіла бы-м на край світа» і «Ластовочко, десь была?». Ґрупа «Червена ружа», в котрій разом з лавреатком співат Ліля Немеш, остатньо награла свою другу платню з русиньскым репертуаром.