Желізницьом на Лемковину

Лемковина робит ся штораз ліпше скомунікувана з рештом польской державы, а тым самым і рештом желізницьовой сіткы Европы. Од 1. квітня/апріля т.р. зачало реґулярні фунґувати получыня Ряшів-Ґорлиці.

Потяг на трасі Ряшів-Ясло-Ґорлиці зас появил ся на желізници аж по 10 роках перервы. Перший одъізд з Ґорлиц перешол в торжественных обставинах при участи вшыткых місцевых власти, віпів та любителів желізниці. Бескідскій Жачок, бо таку назву достал новий курсуючий шынобус, буде іздил од квітня до червця в пятниці і неділі – в заложыню мат він быти презначений для студентів, якы столицю підкарпатского воєвідства – Ряшів, чысленні выберают як другій, по Кракові, академіцкій осередок полудньовой Польщы. Получыня Ґорлиці-Ясло (Бескідскій Жачок) было урухомлене і прото, жебы го зсинхронізувати в Яслі з потягом Бєщадскій Жачок, якій – тіж од недавна – зачал курсувати на трасі Команча-Ряшів. Од Ясла до Ряшова будут іздити вєдно. Завдякы тому, мож потягом доіхати на східню і середню Лемковину. Час переізду Ґорлиці-Ряшів то 2 год., ціна – неціле 7 зл., а вчас ізды мож ачий хоснувати дармове получыня з інтернетом через ві-фі.

Кєд подорожны охочо будут выберати тот вид транспорту на реченых трасах, од жолтня потяг курсувал буде в каждий ден тыжня, а не лем в вікенды. Приверніня желізницьового руху стало ся можливым за справом пасийонатів потягів, м.ін. соспільности зосередженій попри kochamkolej.pl, якы активні лоббували за приверніньом в тоту част Польщы желізницьовых получынь і, очывидно, при спертю власти малопольского і підкарпатского воєвідств та вшыткых самоурядів, прилігаючых до трасы переізду потягів.

Модернa дрезина то не єдний потяг, якій буде іздил по Лемковині. Од мая рушают першы переізды потягом ретро, в якого склад входят: забыткова парова локомотива з 1946 рока і ріжны історичны ваґоны. На сайті kolejegalicyjskie.pl явила ся докладна розписка переіздів. Кєд іде о Лемковину, то перша прогулька на трасі Малопольскых Пути Желізницьовой Туристикы пройде з Нового Санча до Ґорлиц 3. мая, а на трасі Новий Санч-Крениця та Крениця-Мушына-Крениця –  28. мая. Хто не заімат ся на тоты переізды, буде міг іщы спрібувати в вересни/септембрі, на коли заплянувана єст друга іх тура. На розписці найдете тіж даты переіздів на інчых трасах, м.ін. 70-кільометровым путьом з Хабівкы до Нового Санча, якій принимат ся за єден з найкрасшых желізницьовых пути в Польщы, ачий в Европі.