В найблизшу суботу Х Конґрес Стоваришыня Лемків

7. квітня/апріля 1989 р. адміністрацийный выділ воєвідского уряду в Ліґници зареґіструвал Стоваришыня Лемків – першу повоєнну лемківску орґанізацийю, котра зродила ся на фоні демократизациі жытя в Польщы.

Як раз того рока орґанізация споминат 35. річницю од даты офіцийного основаня. Річниця сходит ся з заплянуваным на найблизшу суботу, 20. квітня/апріля Х Конґресом Стоваришыня Лемків, якій одбуде ся в Ліґници.

Конґрес – як найвысша статутова власт Стоваришыня – рішыт м.ін. о абсолюториі для уступуючого правліня, а так само в його рамках выбраны будут ведучый Головного Заряду Стоваришыня Лемків і новы члены двох орґанів – Головного Заряду та Головной Ревізийной Комісиі.

З огляду на округлу річницю діяльности – в проґрамі передвиджено част посвячену упамятніню подій з 1989 р.

Честном традицийном принятом на попередніх Конґресах Стоваришыня Лемків є, што участникы все споминают на своіх товаришів, заслуженых діячів, якы в посліднім часі одышли до Вічности. На попереднім засіданю, котре проходило в 2021 р.,  зобраны оддали чест для Павла Стефановского, Богдана Ґамбаля, Владиміра Гнатишака і Ваня Поручника. В часі од посліднього конґресу дотепер одышли дальшы заслужены діячы, в тым м.ін. єден з отців-основателів Стоваришыня Лемків, Димитрий Русинко.

Вчас конґресу делеґаты і запрошены гості будут мочы зголошувати постуляты до покликаной в тым ціли Комісиі Постанов і Внесків. Конґрес як найвысша власт рішат м.ін. о плянях на дальшу каденцию, в тым о пріоритетах, котры треба рішыти в соспільно-політичній діяльности Лемків в Польщы.

Дотепер одбыло ся девят конґресів, а окрем них і штырі Надзвычайны Конґресы, якы были посвячены актуальным проблемам і внескам складаным членами орґанізациі. Першый – історичный – конґрес СЛ одбыл ся 8. грудня/децембра 1990 р. в Ліґници.